ភ្នំពេញ៖ ក្រសួងសុខាភិបាលកម្ពុជាបានទទួលឱសថសម្រាប់ព្យាបាលនិងបង្ការជំងឺផ្តាសាយបក្សី ចំនួន៣ពាន់ដូសពីអង្គការសុខភាពពិភពលោក។

នៅថ្ងៃទី២៨ ខែកុម្ភៈ ឆ្នាំ២០២៣ ក្រសួងសុខាភិបាលតំណាងដោយនាយកដ្នានប្រយុទ្ធនិងជំងឺឆ្លងបានទទួលឱសថឈ្មោះ Tamiflu (oseltamivir ) សម្រាប់ព្យាបាលនិងបង្ការជំងឺផ្តាសាយបក្សី ចំនួន ៣ពាន់ដូស ។

ឱសថនេះទទួលបានជំនួយពីអង្គការសុខភាពពិភពលោក (WHO) នឹងប្រើសម្រាប់ឆ្លើយតបការរាតត្បាតផ្តាសាយបក្សី H5N1 នៅខេត្តព្រៃវែង និងខេត្តដទៃទៀតក្នុងកម្ពុជា ដែលអាចកើតមានរាតត្បាតជាយថាហេតុ។

គួរឱ្យដឹងដែរថា រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន ឱ្យដឹងថាក្រោយជំងឺផ្តាសាយបក្សី H5N1 ដែលកើតលើក្មេងស្រីអាយុ ១១ឆ្នាំ បានទទួលមរណភាពនោះ មកទល់ថ្ងៃទី២៦ ខែកុម្ភៈ ឆ្នាំ២០២៣ ត្រូវបានរកឃើញតែ ២ ករណីប៉ុណ្ណោះដែលបញ្ជាក់ដោយមន្ទីរពិសោធន៍ ហើយឪពុករបស់នាងដែលបានបញ្ជាក់ថា មានផ្ទុកមេរោគ H5N1 ត្រូវបានមើលថែទាំ និងព្យាបាលនៅមន្ទីរពេទ្យបង្អែកស្រុក ទទួលបានលទ្ធផលអវិជ្ជមាននៅព្រឹកថ្ងៃទី២៧ ខែកុម្ភៈ ឆ្នាំ២០២៣ ប៉ុន្តែនៅតែស្ថិតក្នុងមន្ទីរពេទ្យដើម្បីបញ្ចប់វគ្គព្យាបាលតាមពិធីការនៃការប្រើប្រាស់ថ្នាំ។

ទោះជាយ៉ាងណាក្រសួងសុខាភិបាលនៅតែក្រើនរំលឹកឱ្យបន្តការប្រុងប្រយ័ត្ន ដើម្បីសុវត្ថិភាពផ្ទាល់ខ្លួន និង អនុវត្តវិធានការការពារដោយលាងដៃជាមួយសាប៊ូ និងទឹកស្អាតឱ្យបានទៀងទាត់ ជាពិសេសមិនត្រូវប៉ះ ឬនៅឱ្យឆ្ងាយពីសត្វបក្សីឈឺ ឬងាប់ បរិភោគអាហារឆ្អិនល្អ៕